Fui hoije la eileiçon de l Diretor de l Agrupamiento de scuolas de Sendin , al qual cuncorrírun trés porsores. L porcesso de abaliaçon de las candidaturas fui feito por l Cunseilho de l Agrupamiento , de que fázen parte repersentantes de ls porsores i de ls ampregados de la scuola, repersentantes de ls pais i de las associaçones i ainda de la câmara i de la junta de Freguesie.
Apuis de la botaçon
Ls candidados apersentórun ls sous porjetos cun las porpuostas de anterbençon na scuola i ls sous “curriculum vitae”, que fúrun debidamente aperciados assi cumo se sujeitórun a ua anterbista. De todos fui feito un relatório que todos ls membros de l cunseilho aperciórun.
Ua parte de l cunseilho
Cumo an todas estas cousas an que hai mais que un candidato i que la democracie funciona, nunca hai ounanemidade i ye natural todos queréren ganhar. La çcusson fui grande, las reglas de la eleiçon fúrun cumpridas i ne l fin fizo-se la botaçon.
Outra parte de l cunseilho
L buono trabalho de l cunseilho diretibo que acaba funçones fui debidamente aperciado i cumo ua candidata era la garantie de la cuntinaçon, nada ademirou que benisse a ganhar, yá que l trabalho fui buono para la nuossa scuola. Sendo assi la doutora Ana Luísa Pombo ganhou cun 17 botos de ls 21 de l cunseilho.
L HOIJE quier deixar eiqui un agradecimento al cunseilho diretibo que acaba l sou mandato, pul trabalho feito i por l carino que siempre tubo pul HOIJE i desear las melhores felcidades a la nuoba diretora, doutora Luísa.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
