Quando bejitamos las eigreijas ou catedrales miramos para ls altares i quedamos ademirados cun ls trabalhos que bemos, mas poucas bezes pensamos an quien fizo todas aqueilhas obras de arte. Ye todo un trabalho an talha de madeira i an talha dourada cun mil i ua forma i feitiu a eimitar froles, fruitos ou figuras houmanas.
Un trabalho an talha de madeira
Fui an Sendin, que l HOIJE dou de caras cun ua obra que stá a ser feita para ua eigreija de ls alredores de Sendin, para serbir de sitio adonde se farán las leituras durante la missa. Ye un sendinés que la stá a fazer. Quando acabada yá bos la amostrarei ne l sitio adonde bai a quedar, assi cumo l artista que la stá a fazer.
Un pormenor de la obra
Muitas bezes falamos i screbimos subre artistas, por séren mais coincidos ou tenéren quien deilhes deia amboras mais a menudo i squecemos tantos outros cun tanto ou mais balor, mas la bida ye mesmo assi. L HOIJE siempre que ten la ouportunidade dá a coincer ls sendineses.
Ua amostra de l que será la obra
Quantos artistas anónimos, cumo este i talbeç melhores trabalhórun ne ls altares, casas i capielhas de l Praino sien que naide falasse ou tenga amboras de l sou trabalho? Pus hai que deixar algo screbido para que las geraçones feturas téngan mais amboras que nós.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
