De tiempos a tiempos l mundo ye atacado por malinas que chégan a matar melhones de pessonas. La gripe A ye la purmeira deste séclo, mas muita giente inda se lembra de la gripe asiática ou de oubir falar de la pneumónica, esta segundo dezie mie mai, matou muito sendinés, habie dies de trés i quatro anterros.
La Gripe
Inda que muito se fale de la fin del Mundo i que será cum fuogo, fame, peste i guerra, nun mos parece que seia assi, porque siempre haberá desso todo, an todos les tiempos, mas l home acaba por subrebíbir. Hoije ya hai medicinas, i conhecimientos para las fazer, que eibitarán grandes males..
L fin del Mundo
Mas se l home, cumo ser anteligente bai aprendendo a defender-se destas calamidades i cada beç ten mais cundiçones de subrebibir, nunca ye de mais pedir a todos que tengámos cuidado cun la limpeza, labando bien las manos e se acauso mos tocar por la puorta la gripe, fazer todo por nun cuntaminar ls outros.
Hay que tener cuidados
An 1348 Pertual fui atacado por la peste i morríu la metade de la giente. Agora esso nun bai a acuntecer, porque la malina nun ye tan peligrosa i hai medicinas para la curar, mas cuidado i caldo de pita nunca fizo mal a naide.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
