Apuis de la antrega de la fiesta, als nuobos mardomos, cun la antrega de l pendon de Santa Barbela, la banda de musica “Pinheiro da Bemposta”, ua de las mais afamadas bandas de Pertual, dou un cuncerto para la giente que anchie la Praça i de seguida ls mardomos, nuobos i bielhos subírun al palco.
La banda
La giente anchie la Praça
Ne l palco fizo-se la cerimónia de la antrega de l simblo de la fiesta, que ye ua eimaige de Santa Barbela a la mardoma mais bielha, para que la tráten bien durante l anho que ténen a sou ancarregue la mardomie. Son estas pequeinhas cousas que se fázen, mas que amóstran que Sendin ye ua tierra grande i chena de segneficado.
La nuoba mardoma amostra l simblo de la fiesta
Ls nuobos mardomos cun l pendon
I chegou outro momento tamien muito sperado por todos, que fui l sorteio de ls prémios de las cadernetas. L sorteio tem siempre la presencia de la autoridade, que fui representada pul comandante l nuosso quartel, l cabo Filipe. Las ninas tirórun ls bilhetes i l carro quedou an Sendin, fui l presidente de ls Bumbeiros, Ilídio Rodrigues, l home de la suorte.
L sorteio
L representante de ls nuobos mardomos a agradecer la antrega de la fiesta
Acabado l sorteio, ls mardomos bielhos agradecírun la ajuda de toda la giente i l representante de ls nuobos mardomos, agradeciu la antrega de la fiesta i an nome de todos dixo que todo íban a fazer para que la fiesta cuntinasse a bien representar Sendin.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
