Tamien la antrega de la fiesta fui çfrente cun ls mardomos bielhos a sperar ls nuobos ne l adro de la eigreija cun la banda de musica porparada ne l Sagrado para dar un cuncerto. Ls mardomos nuobos fúrun trazidos por ls grupos de pauliteiros de Sendin i de Fuonte Aldé, que ls acumpanhórun até las puortas de la eigreija adonde ls speraba Santa Barbela.
Ls mardomos nuobos camino de la eigreija
Chegados al adro de la eigreija, ls grupos de pauliteiros formórun, un de cada lado de la puorta de la eigreija, adonde staba santa Bárbela i fui anton que ls mardomos bielhos antregórun l pendon de la Santa , als nuobos, seguindo-se ua dança de palos, que fui ua einobaçon que quedará na mimória de muita giente.
Ls grupos a dançáren al miesmo tiempo
Por la purmeira beç, que you tenga bisto, ls grupos de Sendin i Fuonte Aldé dançórun al miesmo tiempo, ls mesmos laços i acumpanhados por três gueiteiros que tocában tamien la miesmo tiempo para ls dous grupos. Solo quien sabe i yá dançou, poderá dar l berdadeiro balor a esto. Fui un spetáculo único de arte i saber.
Un mar de giente
Dous amigos, un bieno de l Canadá i l’outro de Oustrália
L Sagrado staba cheno de giente i fui un berdadeiro mar de giente que assistiu a todo esto. Todos ls que nun stubistes acá mirai a ber se ancuntrais ls buossos ami(g)os i familhiares. Até de l Canadá i de la Oustrália benírun a la fiesta.
L HOIJE, cumo siempre, stá ne l sitio cierto i registra ls momentos que quédan para siempre.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
