Este anho l peditório de la fiesta de Santa Barbela fui çfrente de l de ls outros anhos, yá que nun fui feito cun bandas de musica. Para muita giente fui ua ademirança mui grande, mas fui ua eideia einobadora i se para uns nun fui melhor, para outros fui anteressante, mas tubo ua bantaige que fui fazer l peditório mais debrebe.
L grupo de gueiteiros mirandeses
Éran bários grupos de gueiteiros i de dulzaineros que por las rues íban tocando al miesmo tiempo que ls mardomos recolhíen la zmola. Muitos destes grupos son mui apreciados por toda Castielha-Leon i son eilhes, ls que tócan nas fiesta de l lado de alhá de la raia. Mas sabemos cumo ye deficele la giente aceitar nun oubir tocar la musica.
Un grupo de dulzaineros
Habie grupos mui buonos i fui pena, an beç de se pensar an fazer la cumparança cun las bandas de musica, nun tratar la giente de apreciar la arte desses grupos. Las comissones de fiestas quieren siempre fazer l melhor, mas nin siempre las cousas sálen cumo se quier. Mas ye na çfréncia de eideias que l mundo abança.
Outro grupo
Para l anho son outros ls mardomos i tamien iremos ber nuobas eideias, l que será buono para Sendin i para la fiesta. Estes yá cumprírun la sue misson i deseamos las melhores felcidades para eilhes i para ls nuobos porque bien ban a percisar de la ajuda de todos.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
