L camboio fui ua de las atraçones mais amportantes para ls ninos i ber-los a querer íren ne l camboio por las rues de sendin fui ua cousa marabelhosa, mas hoije l passeio de burro fui tamien un berdadeiro spetáclo. Ls filhos de ls nuossos eimigrantes i de ls que bíben nas cidades stában cuntentos, yá todos quíren benir mais bezes, porque Sendin ye que ye buono.
A cabalho ne ls burros por las rues de Sendin
Uns ne ls burros i outros ne ls camboios, que éran tantos que habie que fazer bárias biaiges i nun podíen star parados, por esso se fazírun bárias atibidades al miesmo tiempo. Mas tamien habie la animadora de la fiesta, que iba dando als ninos balones de bariadas quelores i feitius.
Burros i camboios salíen de an pie de l cruzeiro
Ma habie l jardin cun ls repuchos d’auga i ls ansuflables para adebertir ls que tenien que sperar la sue beç ou yá nun queríen dar mais buoltas de camboio ou de burro. Todo esto ye possible porque hai muito sendinés a trabalhar todo l anho i ye esto que faç cun que ls que stán fuora téngan ganas de tornar.
La animadora de la fiesta
La zabumba
Ls ansuflables
Mas tamien habie atibidades culturales cumo la sposiçon de la casa de la cultura adonde fumos ancuntrar las cuncertinas i las zabumbas cun que datrás se tocaba, mas que inda hoije se úsan nas rondas i a cantar ls reis.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
