Mais un die de triato an sendinés, an Sendin i desta beç por las formandas de l curso de l 12º. anho que l NERBA stá a dar an Sendin i que ten sido ourientado ne l sentido de las tequenicas de benda de pordutos. Muita giente stubo a ber i adorórun l que bírun i pedírun mais.
Ua cena de l triato
La pieça de triato tenie cumo tema la benda de l alforraque i fui toda eilha an sendinés i representaba las bariadas situaçones de la bida, nua feira tradecional. Fúrun representadas por todas las formandas, que ambentórun ls diálogos ou ls amprobisában cunsante cada situaçon.
Muita giente stubo a ber
Fui ua nuite de alegrie por bariadas rezones. Por un lado, las cenas tenien un sinués de houmor berdadeiramente sendinés, que ye único quando ls diálogos son an sendinés berdadeiro i antre sendinesas, que amostrórun que la nuossa léngua inda ye ua léngua biba i de l pobo.
La caraterizaçon staba perfeita
Mas la alegrie maior fui ber l balor de las sendinesas i tamien de alguas de tierras de alredor de sendin, que amostrórun que podemos cuntar cun eilhas para l feturo de la nussa cultura, quier para promober la léngua, quier para rebibir l triato popular, cun tantas tradiçones an sendin.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
