Nun ye un torneio mediabal, mas poderie ser porque bai sendo moda por barias tierras de Pertual, fazer rebibir la bida mediabal ne ls castielhos. Nós tubimos un pequeinho castielho que fui çtruido nas guerras luso-leonesas, mas yá naide puode saber adonde serie. Las crónicas dessas guerras dízen que fui çtruido l castielho de Sendin i Picuote.
La guerra agora ye esta
La malta de 1990 resolbiu fazer un torneio, mas de futebol i las maltas de ls bários anhos poderien partecipar. Habie maltas de bários anhos, antre la mais nuoba i la mais bielha habie mais de diç anhos de çfréncia, mas esso nun fui porblema, porque l que fui mais amportante fui partecipar.
Muita giente fui a ber ls jogos
Nun bamos eiqui a falar de ls resultados porque nun ye l mais amportante, mas si de l cumbibio antre ls moços i moças de Sendin, que por bias de la eicelente ideia de la malta de 1990, ajuntou mais de duzientos moços i moças ne l campo de FUTSAL de Sendin. L torneio stubo bien ourganizado i todo corriu bien.
Ls mais nuobos fúrun ls mais acarinados por todos
Hoije son ls jogos que ban a cuntinar manhana i que acabarán cun la antrega de las taças i ua cena para todos. Sendin ye mesmo assi, ua tierra siempre an mobimento.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
