La eigreija de Sendin anchiu-se de giente cumo se fusse la missa de l galho ou la missa de l die de Páscoa, éran las cinco de la tarde de l die 1 de Agosto. L’Alma – Grupo de cantares de Sendin , bestidos a rigor íban a dar mais un festibal de musica i cultura. L grupo, que ye yá un de ls mais cunsagrados de Pertual i Spanha cantou i ancantou cun ls sous cánticos relegiosos tradecionales mirandeses.
L grupo ye mesmo un grupo de respeito
Ls cantares fúrun cumo que scolhidos a dedo, de l melhor de la tradiçon religiosa de tierras de Miranda. Para mi i para muitos sendineses mais bielhos, fui ua eimoçion oubir la eigreija anchir-se culs sons ls cánticos mais antigos i que you oubie, quando garoto, l pobo todo a cantar, nua eigreija a abarrotar de giente.
L coro ye tan guapo que bale la pena ber-lo de mais acerca
Sendin siempre tubo fama de na eigreija se cantar bien i cun todo l pobo a acumpanhar, mas desta beç ten un coro de que bien mos podemos ourgulhar, cun giente de todas las eidades a dezir que ye un coro de feturo. Este coro ten que ir pul mundo a amostrar la marabilha de ls nuossos cânticos.
Giente de todas las eidades, mas mirai bien para las roupas
Yá, an Madrid, nua catedral ancantou centenas de pessonas, que l fúrun oubir i ye dua grabaçon desse die que fizo l drº. Mário Correia, el nun gusta que le tratemos por drº., mas neste momento ten que ser, que cun l’apoio de la câmara, fui feito un CD ouferecido a quien stubo persente.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
