L Festibal Antercéltico fazie 10 anhos i l ourganizador, Mário Correia , quijo que fusse tamien un festibal de cultura i cunseguiu-lo cun las bariadas atibidades culturales que se fazírun por bários sítios de la bila i cun la anterbençon de muitas antidades que dórun l sou melhor para que Sendin fusse nestes dies – la capital de la cultura de l Praino -.
La Compratiba staba guapa
Fui na compratiba la apersentaçon de ls libros, an léngua mirandesas, de ls nuobos outores mirandeses i que eiqui apersentamos:
- Alfredo Cameirão - cun l libro TORTULHAS – cuontas deste Mundo i de l Outro.
- Faustino Antão – cun l libro NUOBAS FÁBULAS MIRANDESAS – i Cuntas Sacadas de la Bida.
- Fonso Roixo – cun l libro L PURMEIRO LIBRO DE BERSOS .
- José António Esteves – cun l libro LS BERSOS DE JENTONHO
José Esteves de l lado squierdo i Faustina de l dreito
(Ana stá ne l meio que tamien stubo persente)
De l lado squierdo Alfredo Cameirão i Amadeu a seguir
Muita giente stubo a assistir a la apresentaçon i nun faltórun ls repersentantes oufeciales, la delegada de la cultura i até la deputada Ouropeia Ilda Figueiredo, que yá muitas bezes mos ten besitado i que mos lembrou, que yá an 1983 habie falado de la nuossa léngua na Assamblé de la República.
La giente era muita
Ilda Figueiredo ne l meio de la giente
La apersentaçon destes libros de léngua mirandesa fui un ato stórico de ls maiores de la stória de la léngua, porque fui an tierras de Miranda i cun scritores de las trés zonas de la léngua, l raiano, l central i l sendinés, todos armanados nun ato a que ls sendineses dórun l maior apoio i inda po riba cun ua proba de bino, marca Léngua mirandesa , que la compratiba, persidida pul porsor Almendra, oufereciu.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
