L Festibal Antercéltico ye siempre un acuntecimiento amportante na nuossa tierra porque trae giente de todo mundo i este anho cumo ye l 10º. anho que se faç maiores son las respunsabilidades de ls ourganizadores i nada fui squecido, porque para alhá de la musica celta i de ls cuncertos, muita outra atibidade hai por toda la bila.
L cuncerto cun Maria Salgado
La ourganizaçon ye eisemplar i ye esso que faç benir cada anho la mais bariada giente de todos ls lados, nun faltando menistros, deputados ouropeus, deputados nacionales, mas l que ye la base de l festibal son ls moços i moças de toda la region de l Praino i de Castilha-Leon, assi cumo muito moço i moça de toda Ouropa.
La taberna de l licor celta
La cerbeija
La bebida de ls Diuses
Este anho l Festibal ye ne l nuobo recinto de las eiras, un berdadeiro sitio para fiestas i para las pessonas i ninos durante l anho podéren passear i gozar de un spácio onde hai de todo para bielhos i nuobos podéren passar un rato, mas un die destes bos daremos cuonta de l que ye. Obra de las mais amportantes que se fizo na Sendin i que ralas tierras ténen eigual.
Sposiçon de anstrumientos musicales
Las atibidades culturales al rededor de l Festibal son muitas i bariadas, que aníman toda la aldé i podemos mesmo dezir que l Festibal ye ua berdadeira fiesta de todo l Praino, mas mais inda, de toda la giente de Sendin.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
