Hoije fui l die de l Festibal l burro i l gueiteiro na aldé de Fuonte Aldé. La feira de anstrumentos musicales eibéricos, que ne l Sábado stará tamien na Sendin fui ua de las atibidades mais cuncorridas i muita giente de bários países la besitou, mas muitas outras atibidades se íban fazendo por toda la aldé.
Anda-camino
L grupo de musica tradecional anda-camino i que ten cumo lema l dito popular : “ cun pan i bino yá se anda camino” fui un de ls animadores de la tarde i mesmo por la manhana acumpanhou la caminada de burru antre las aldés de Atanor i Fuonte Aldé, cun muito moço i moça a fazéren la caminada, que acabou cun la séstia ne l lameiro mais acerca.
Eliseo Parra
L artista spanhol Eliseo Parra, un de ls mais cunsagrados de la musica tradecional animou l arraial i fui muito apreciado por todos ls partecipantes ne l burro i l gueiteiro que anchíen l largo de Fuonte Aldé. Mas l cumbíbio antre las mocidades de l praino que stában presentes tamien fui amportante.
Ls uxucalhus
Ls uxucalhus an atuaçon
Mas ls moços i moças gústan tamien de ua buona banda a tocar i ls uxucalhus atuórun até altas horas, nun puodo dezir até quando porque yá me tengo que deitar mais cedo que ls demás.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
