L Festibal de l Burro i l Gueiteiro ye un ajuntouro de giente de todo mundo. Onte stubimos a la nuite an Atanor i quedemos ademirados. Se ls carros éran mais de cachaquinze, botai-le la cuonta a la giente que serie, por ende uas quenhintas ou mais pessonas i pul meio éran tantas las falas çfrentes que cuidemos que habie passado cumo na torre de Babel.
La banda
Pongo-me a screbir i apuis ye que me dou cuonta que la giente puode nun antender l mirandés ou nun saber alguas cousas de que falo. La torre de Babel fui ua torre de que fala la Bíblia i que ls homes stában a fazer para chegar al cielo, mas Dius para que nun fússen tan ourgulhosos pus-los a todos a falar ua léngua çfrente uns de ls outros i cumo deixórun de se antender, la torre nunca chegou al cielo.
Scacha barrilas
Jogo de l pion
Mas bamos al arraial, habie ua banda de musica para antretener la giente, mas l mais amportante de l festibal era la animaçon popular que se fizo ne l largo de la Associaçon de Atanor, que ten un buono sitio para fiestas i para serbir bebidas i café a quien bai alhá. A la nuite ye un sitio agradáble para se star,
Habie muito jogo de animaçon
La giente partecipaba i staba cuntenta
De la animaçon fazien parte muitos jogos, cumo ls que se puoden ber ne ls retratos, sposiçones, palhestras i musica tradecional a que nun faltórun ls gueiteiros. Manhana ye noutra aldé.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
