Tamien na Compratiba fui apresentado un CD de l grupo sendinés Lenga-Lenga – L teçtemunho que ben anriquecer l património musical de la nuossa tierra, que ganhou la sue maior fuorça cun l Festibal Antercéltico i l trabalho de l diretor de l “Centro de Musica tradicional – Sons da Terra”, Mário Correia.
Mário Correia a apresentar l CD, ls libros i ls outores
Ten sido muita la produçon de CD’s pul Centro de Musica, cun l’ajuda de la Cámara Munecipal que ten benido a fazer un trabalho mui amportante para l’apoio i la dibulgaçon de la musica i de ls músicos de l cunceilho. I la giente yá partecipa nas manifestaçones culturales.
Ye amportante ber la partecipaçon de tanta giente
Nun ye fácele ajuntar, nua pequeinha tierra de l Nordeste de Pertual, tanta giente nun eibento berdadeiramente cultural, mas eiqui esso ye possible porque Sendin ye un berdadeiro manatial de arte i cultura i de giente que sabe ber i antender l que ye amportante.
Lenga-Lenga (Telmo, Henrique, Dinis i David )
Mas inda queda muito por fazer i ye a esso que hai que botar mano, para sermos cada beç mais ls luzeiros de la berdadeira cultura mirandesa. Nun bamos a spetrar por un anstituto de l goberno, bamos a criar ua Fundaçon de la Cultura i de la Léngua Mirandesa i Sendin ten la oubrigaçon de caminar na delantreira.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
