Ls mardomos de la fiesta de Santa Barbela pedírun a la câmara de Miranda de l Douro l camboio eilétrico que fui ouferecido por la EDP para andar ne l centro stórico de Miranda i animáren assi la fiesta de Sendin, fazendo cun que ls ninos tamien tubíssen algo para eilhes durante ls dies de la fiesta.
L camboio an Camino Prado
L camboio bino para Sendin i fui un berdadeiro sucesso para ls ninos i até ls grandes quejírun andar nel por las rues de Sendin. Para quien se lembra de l camboio de fierro passar por la staçon, fui ua alegrie ber este pequeinho camboio por las rues de Sendin.
A chegar cun mais ua carrada de giente
Estas einiciatibas tamien son amportantes porque la fiesta tem que ser para giente de todas las eidades i la maior parte de las bezes squécen-se ls ninos i estes son ls que dében ser mais acarinados i hai que le dar motibos para se sentíren felizes i podéren lembrar siempre la tiempos de pequeinhos, cumo dies de felcidade.
Éran muitos ls que queríen andar ne l camboio
Manhana haberá mais camboio i tamien ls burros starán para que ls ninos púoden andar a cabalho i sabéren l que era l meio de tresporte mais amportante de ls sous abós. Teneremos la animaçon de ls palhaços de rue i ls ansuflables.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
