ATANOR – ACRA (Associação Cultural e Recreativa de Atenor) – FAÇ LA SUE FIESTA D’ANHO CUL POBO
Todos ls anhos ne l més de Agosto ye la fiesta d’anho de la ACRA que ten associados de las aldés alredor de Atanor i que cul pobo, que neste die ye cumbidado de honra i inda aporbeitando las bacanças de ls eimigrantes que neste més mos bejítan.
La giente iba-se ajuntando
L sitio ye agradable
La fiesta ye un cumbibio sano antre cientos de pessonas que ténen antre eilhas la amisade por la sue tierra i region. Ye neste die que se mátan souidades de l tiempo en que las pessonas stan apartadas por las necidades de la bida. Hai ls que bénen todos ls anhos, mas hai tamien ls que aparécen ralas bezes i son estes ls que mais aprecían la fiesta.
Ls cozineiros de serbício
Las que serbíen l comer
Fui ua alegrie ber la cantidade de ninos que habie, l que amostra que ls Tanoreses son ua quemunidade grande i cun feturo. Son estes ninos que pals anhos que bénen farán cun que ls padres búolban porque nun squécen las correries i risas culs outros ninos. Na sede de la Associaçon çtribuírun ua lembráncia a cada associado.
Las mesas stában chenas
Na Associaçon las diretoras dában las lembráncias i recebíen las cotas
L quemer ye feito i serbido na Associaçon cun ls diretores a fazéren todo. Tamien hai ls specialistas, sócios que ajúdan i que bénen d’aprepósito todos ls anhos traendo la sue arte i l bino de ls sítios adonde stan para todos probáren. Todo mundo trabalha i ye assi que se fázen andar las cousas.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
