MALTA DE 1959
Quando fázen 50 anhos ls nacidos ne l mesmo anho fázen quaije siempre ua fiesta cun las familhias i ami(g)os para comemorar ls anhos i para alhá de l’almuorço, la ronda por las rues de sendin ye ua tradiçon que nun puode faltar. Las bandeiras de la mocidade, l cântaro de bino i las biolas i cuncertinas aníman las rues.
La malta de 1959
(de la squierda para la dreita – Adelino Pires, Alice Gonçalves, Elisa Pardal, Abílio Santos, Georgina Castro, Rogério Ribeiro, Jorge Soares, Albino Jantarada, Avelino Aleixo e Eliseu André)
Ye siempre ua alegrie ajuntar la malta de l mesmo anho i anton an Sendin, siempre houbo ua amisade berdadeira antre todos, inda que haba siempre, cumo an todo, eicessones, mas que cada beç ban sendo mais ralas. Que la tradiçon se mantenga ye l que todos debemos fazer.
La ronda a la buolta de la eigreija
Quando fazíen ls biente anhos ou quando se casában, la ronda era por las rues de l pobo, alguns inda s’astrében a fazer-lo, mas ls mais deilhes yá se cunténtan en dar la buolta a la eigreija, mas la giente ne l Sagrado colabora i nun se faç rogada a bober ua pinga i a comer ls antramoços.
Tamien houbo baile
La malta de 1959 inda stá bien lebe porque ne l Sagrado dançórun cumo moços i moças de biente anhos. Cun tanta cousa que hai todos ls dies i cun giente cumo ten sendin, inda bos ademirais de l HOIJE tener siempre que amostrar!
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
