Nun stamos a dezir nanhue cousa para ampressionar la giente, solo stamos a dezir l que acunteciu onte ne l Praino. Ampeçou acerca de Teixeira i lougo se trasformou ne l maior fuogo de que hai mimória. Nunca naide se lembra de ber ou oubir falar de un fuogo tan grande. Muitos sobreiros cun cientos de anhos zaparcírun.
L fuogo ampeçou
Debrebe ganhou fuorça
Las labaredas éran einormes
Las labaredas assopradas por un airico certico, de brebe ganhórun tal fuorça, que mais parecie l’anfierno an bida. Cerrados, montes i caminos, nada scapaba a la fuorça de l fuogo. Ls bumbeiros lougo aparecírun, mas acontra un fuogo tan fuorte e inda po riba cul aire i l termo a la moda, fui defícele aguantar.
Ls bumbeiros lougo aparecírun
Tomórun posiçon para pegar ne l fuogo
Mas Teixeira stubo an risco i houbo que librar la poboaçon
Benírun quaije todas las corporaçones de bumbeiros de l çtrito i inda cun la ajuda de dous abiones i un eilicopetero, mas mesmo assi i todo fui defícele pegar ne l fuogo. Por la nuite alantre inda se fazie todo por l trabar i fui solo de madrugada que l dominórun. Balientes bumbeiros, homes i mulheres que dórun mais do que l que podíen i até nalguns casos cun risco de la bida.
Ls abiones fazíen l sou trabalho
Mas por la nuite alantre inda habie fuogo
Houbo situaçones cumplicadas, cum bumbeiros a tenéren que ser socorridos, mas eibitou-se l pior cun ls moços i moças de todas las corporaçones a fazéren l melhor. Ua palabra de agradecimiento als bumbeiros de Sendin, que quando bírun un sou cumpanheiro aflito todo fazírun para l traer libre i salbo.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
