Mas que cousa será esta? Caga la baca , mas será estou ua ambora de se dar ne l HOIJE? Podeis acraditar que ye i bien anteressante. La nuoba direçon de l Grupo Çportibo, para cumbatir la crise i para que l Grupo Çportibo de Sendin puoda aguantar cun las çpesas de l campeonato tratou de çcubrir la maneira de animar la giente i arranjar algun denheiro.
Ne l campo ajuntou-se bastante giente
Ls nuobos diretores son todos moços i animados i ampeçórun yá a trabalhar i onte l campo de la bola serbiu para fazéren ua tarde animada, cun ua gincana de tratores an metade de l campo i na outra metade fazírun l sorteio de caga la baca .
La gincana
Als quadrados de l campo fui dado un númaro de que solo un diretor sabie i las antradas tenien tamien un númaro. Acabada la gincana, botórun ua baça para la metade de l campo cun ls quadrados i ls altifalantes anunciórun que adonde la baca cagasse, l duonho de l númaro desse quadrado ganharie ua bitela.
Roby era l locutor de serbicio
La baca parecie anbergonhada
Mas apuis de ganhar cunfiança ampeçou a andar pul campo
Fui alhi que cagou
La baca parecie cun poucas ganas de que alguien ganhasse la bitela, talbeç porque nun querie que serbisse para l talho ou anton staba afeita culs diretores para que la giente fusse bobendo mais ua cerbeija ou un semol. Mas quando Charrau dixo que iba a buscar la burra, alha cagou deixando cuntento un tiu de Teixeira, que yá bai a fazer ua fiesta cun la bitela.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
