Para la maiorie de ls eimigrantes i de ls que trabálhan nas cidades i que benírun a passar las bacanças a Sendin, parece que las miesmas se acabórun, ya que quaije todos yá se fúrun. Sendin, que nestes últimos meses tenie giente por todo lado, queda cada beç mais calhado, ls filhos partírun de casa i yá nun se oube tanto barulho.
Ne ls dies nomeados l Sagrado anchie-se
I ls eimigrantes aporbeitában para faláren
Ye assi la bida de ls dies de hai uns anhos para acá, zde que ls sendineses passórun a tener bacanças i inda bien que hai cada beç mais que las ténen, porque nun falta adonde passáren un rato bien passado, yá que tenemos sítios lindos, pena que muitos nun ls aporbéiten melhor.
L jardin ye lindo, mas hai que le dar bida
Quando screbi bacanças para dezir férias, fui porque cumo bien dixo l Pe. Manuel Preto, ne l sou libro de bersos an mirandés, l nome férias nun eisiste an mirandés, porque ls mirandeses nun sabíen l que era esso, solo quando ls eimigrantes, na sue maiorie de Francia, ampeçorun a benir de bacanças ye que l nome francês “vacances” fui antruduzido ne l bocabulairo mirandés cumo “bacanças”.
Tenemos que criar mais cundiçones para esto ser melhor aporbeitado
Cumo iba dezindo l nome bacanças passou a fazer parte de l nuosso bucabulairo, mas hai que fazer cun que las bacanças pássen a ser cousa de todos. Naide bai a fazer un mundo perfeito, mas puode fazer algo para que seia mais eigual.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
