Passórun 31 anhos i muita cousa acunteciu, mas yá Sendin andaba nas bocas de l mundo i nó por mal, mas porque era amportante i tenie muita giente que sabie i trataba de la cultura i por la purmeira beç la puosta fui assada ne l Casino Storil por la Grabiela i cun leinha que fui deiqui. Sendin fui nuoba ne ls jornales i telebison.
La tie Grabiela a assar la puosta
Mas nun fúrun solo a assar la puosta, fúrun tamien al Museu de l Traje de que era diretora la scritora, Natália Correia que muito apreciou ls ansinamentos de las sendinesas i deixou mesmo un agradecimento scrito a Arminda dos Anjos Falcão, cumo podeis ber ne l retrato que pongo a seguir.
Agradecimento a Arminda Falcão
Éran anhos na que Sendin era ua tierra que fazie raia ne l que diç respeito a la cultura, mas debrebe l cortórun las alas. Cumo dezie l poeta “ cortórun las alas al rouxenol, rouxenol sien alas nun puode bolar”. La roca que bos amostro a seguir, fui feita por un mirandés i sabeis an que anho? 1921
La roca trabalhada que stá nesse museu
Mirai bien para l pormenor de ls zeinhos
Nun éramos un pobo atrasado, mal tratado puls de l goberno si, cumo hoije inda acuntece, porque fumos siempre gobernados puls sous criados de serbir. Mas l pobo cuntinou ourgulhoso de la sue cultura i de tal modo, que fizo de la sue léngua la arma cun que lutou, arma que naide puode tirar. Essa arma ten que quedar siempre nas nuossas manos i tenemos que la fazer reluzir cumo ls guerreiros datrás fazíen a las sues spadas.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
