Las ubas este anho amadurórun mais cedo i fumos a certeficar esso i fui buona eideia ampeçar la bemdimia mais cedo. La Dega abre manhana i cuidamos que la culidade de l bino bai a ser buona, porque las ubas stan sanas i cun buono grado.
Ubas tintas
Ubas brancas
Para quien nun sabe, yá se arrincórun mais de 25% de las binhas i por esso la cantidade, este anho, bai a ser menos que ne ls outros anhos i la seca tamien fizo cun que haba menos, mas cumo la culidade bai a ser melhor nun haberá porblemas.
Yá hai quien apanhe para l pipo
Antes de ampeçáren a bedimiar para la Dega , ls que quieren fazer un pipote, ban apanhando mais cedo por esso nun ademira que yá uns dies la giente ande a apanhar ubas, siempre fui assi i nun ye esso que bai a fazer mal algun, por outro lado l tiempo parece rebuolto i la giente lougo se aflige.
L tiempo anda rebuolto
Manhana yá bos amostraremos un lagar anti(g)o adonde inda se faç l bino a la moda anti(g)a.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
