Tener l habito de ler ye ua de las cousas mais amportantes que las pessonas dében querer, mas para esso ye neçairo saber ler. Inda hai muita giente que nun sabe ler, percipalmente de las geraçones mais bielhas, mas pouco se faç para acabar cun esso i mesmo nas geraçones mais nuobas hai deficuldades de leitura, porque ler nun ye solo saber ajuntar las letras ou dezir las palabras, hai que antender l que se lei. Ye l que se passa cun l mirandés i ye por esso que era amportante haber scuolas de mirandés, tamien para giente mais bielha, nó para dezir que hai ou para parecer bien, mas porque ye un bien neçairo.
Todo debe ampeçar ne l ansino oufecial, fazer cun que ls alunos daprénden a ler, mas tamien que gánhen l gusto i l’hábito de ler. Este bideo amostra ua sendinesa, porsora de l agrupamento de scuolas Augusto Moreno , an Bergáncia, la drª. Elisa Ramos i que ye ua de las percipales respunsábles pul plano nacional de leitura, an Bregáncia i que mos fala de l que se stá a fazer alhi. Tamien podemos ber, ne l meio de ls libros, l libro, “Las Mies Purmeiras Letras, an Mirandés”. Nunca ye demais amostrar, que Sendin ten muita giente amportante por todo lado.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
