L negócio de l fumeiro ye un de ls mais amportantes de la nuossa region i ne l anho passado las bendas chegórun a las cien toneladas, anton ne l que toca a las tabafeias, mal las fázen lhougo las alhebántan. Sendin ten cozinas regionales que ténen de ls melhores fumeiros de la region, mas inda hai muitos porblemas a resolber, cumo la criaçon de ls cochinos, que pouco ls faborece yá que hai pouco apoio para la criaçon caseira i ye destes cochinos que se faç l melhor fumeiro.
Miranda i Sendin yá ténen las sues feiras de l fumeiro, mas inda son pequeinhos eibentos, mas tamien nun podemos fazer deste negócio ua cousa de fiesta folclórica para parecer, debemos antes criar struturas que manténgan esta atibidade al serbício de las pessonas i nó para ls políticos se amostráren. Hai que apoiar a quien quier zambuolber i nun ber las cousas cumo se fússen armas partidárias.
Stamos ne l tiempo i ye altura de ls quemeres mais própios desta altura de l anho, por esso, ls que podeis comer sien restriçones debeis benir a probar l que de melhor hai de quemeres regionales, mas para ls que yá tén que tener cuidado cun la comida, podeis ua beç ou outra porbar porque solo faç mal l que ye demais.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
