Las Eiras éran l sitio mais amportante para l pobo, era adonde pacíen las mulas i burras de quien nun tenie outro sitio, era adonde habie auga para todo, mesmo para labar la roupa. Era adonde se trilhaba i se jogaba la bola, era un sitio para star, andar i correr, era l parque de la garotada. Mas para la giente tener pan habie que passar por muitos trabalhos i las Eiras éran teçtemunhas de todos esses sacrafícios, até alhi se recuolhie la munha i ls cagalhones de ls animales para fazer l strume, adubo eicológico i l’único meio que la maiorie de la giente tenie para adubar las huortas.
Para preserbar alguns desses trabalhos, quejírun ls tequenicos de l porjeto de las Eiras, deixar algo i las paredes ténen las pinturas de ls trabalhos de l CICLO DE L PAN . Ye dessas pinturas l bideo que hoije bos amostro, yá que muita giente nun ten la possiblidade de las ber doutro modo. Yá ampéçan a ser çtruidas i inda nun passou un anho, nun queremos pensar que seia d’aprepósito.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
