Quando miramos para l telbison i bemos l que acunteciu ne l Haiti, bénen-mos a la lhembráncia ls pequeinhos tremores de tierra que yá sentimos i de las nuobas de outros de que oubimos falar. Fui an 1969 l maior que sentimos, mas muitos fúrun yá ls tremores de tierra de que demos cunta felizmente que poucos fúrun ls stragos que fazírun, mas tenemos que star porparados para l que puode acuntecer un die. Ls que bíben nas regiones mais atreitas a esso deberán precurar saber cumo se defender, inda que esso nun seia muito fácel, mas siempre ajuda.
Ls maiores de que hai amboras, an Pertual Cuntinental son ls seguintes:
- 1347 terramoto que fizo muito danho an Coimbra.
- 1531 terramoto que atingiu todo l paiç i que fizo caer alguns castielhos.
- 1755 terramoto que çtruiu Lisboua i que dou ourige a un tsunami que fizo yá nessa oucasion muortes ne l Haiti.
Houbo outros tamien ne l mar i ne ls Açores que fazírun muitos danhos.
Quando lemos, studamos i oubimos las amboras destes terramotos somos lebados a pensar an muita cousa, mas gostarie que pensassedes tamien:
– Porque será que Dius, esto para ls que acradítan que eisiste, deixa acuntecer estas cousas?
- Será porque Dius quier que séiamos lhibres i deixa-mos atreitos a todo l que mos puode acuntecer, tenendo que ser nós a resolber todo?
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
