Ampeçou onte an dous sítios la custruçon de l IC5 ne l Praino i l HOIJE , cumo siempre stá an riba de l acuntecimiento, tratou de ir a ber l percípio de ls trabalhos, tirou ls primeiros retratos i fizo tamien un pequeinho bideo de ls trabalhos para quedar registrado pal feturo.
Apuis de Brunhosinho
Quien bai de Sendin para Mogadouro puode ber l purmeiro sito de ls trabalhos, de l lhado dreito, lhougo a seguir a Brunhosinho, na reta de Tó. Nun mos acheguemos muito porque inda stá ne l ampercípio i nun se podie parar mui acerca, na strada 221.
Apuis de Variz
Mais alantre, de l lhado squierdo i un pouco apuis de l’ancruzelhada de Variz outro ampreiteiro ampeçou tamien outro cacho de l IC5. La obra ye mui grande i bai a ser feita por bárias sub-ampreitadas. Para la stória queda la ambora i l registro de que fui onte, die 26, que ampeçórun las máquinas a rumper las tierras i hoije cuntina.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
