Yá stá todo purparado para mais ua eidiçon de l Festibal de Sabores Mirandeses a rializar de 12 a 15 de Febreiro, an Miranda de l Douro. Mais ua beç la cultura, la tradiçon i la gastronomie ban a star persentes neste que ye yá un eibento de refréncia na region strasmuntana. Para alhá desso, este festibal ye un “motor amportante pa l zambolbimiento de l municipio”, diç l persidente de la Cámara , Artur Nunes. Acrecentando inda, “qu'esta ye ua ouportunidade pa ls nuossos agricultores bendéren i al mesmo tiempo dáren a coincer l sou porduto”. A par de l fumeiro ls bejitantes ban inda a tener l'ouportunidade de saborear la buona chicha mirandesa, pus cada die de la feira ye dedicado a las raças que stan repersentadas ne l cunceilho. Zde la bitela mirandesa cula famosa posta, l cordeiro mirandés i l cochino cun todos ls sous deribados. Tamien la música tradecional bai ser ua persençia custante culs gaiteiros, tamborileiros i claro stá, ls pauliteiros.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
