La fiesta de San Sebastian passou a fazer-se ne l purmeiro Demingo a seguir al die 20, se este die nun fur Demingo. Die 24 nun stubimos na fiesta i nun houbo modos de arranjar retratos, mas cumo nun queremos deixar de falar desta fiesta de Janeiro, deixamos-bos este testo an mirandés subre San Sebastian.
Pintura de Marco palmezzano
Die 20 de Janeiro la eigreija celebra la fiesta de San Sebastian, mas ye siempre ne l Demingo a seguir, que se fázen las fiestas de San Sebastian, na maiorie de las tierras. Sendin faç tols anhos esta fiesta, até porque ye l patrono de ls Bumbeiros de Sendin i son estes ls mardomos todos ls anhos.
San Sebastian, mártir de la eigreija era natural de Narbone, filho de ua familhia nobre i melitar, mas fui eiducado an Milan i chegou a capitan de la purmeira corte de la guarda pretoriana, sendo respeitado por todos i preziado puls amperadores Diocleciano i Maximiano, que çcuincíen que el era cristiano. San Sebastian cumprie las leis melitares, mas nun seguie las religiones de la maiorie de ls romanos i cumo Cristiano, bejitaba ls anfermos cristianos presos i pregaba la religion crestiana antre ls sous cumpanheiros. Esto nun podie cuntinar por muito tiempo sien que l amperador tubisse coincimiento deilho i este bino a saber-lo por denuncia de un cumpanheiro de san Sebastian. L'amperador Diocleciano dou-le a scolher antre ser melitar ou seguir la religion crestiana i fui ser crestiano que San Sebastian scolhiu. L'amperador quedou anrabiado i amenaçou-lo de muorte, mas San Sebastian passou a ser suldado de Cristo i a dibulgar la sue religion, l que fizo cun que l amperador l houbisse cundanado a morrer crabiado de frechas. Ls suldados lebórun-lo para un stádio, amplachórun-lo, atórun-lo a un posto, crabiórun-lo de frechas i deixórun-lo, cuidando que starie muorto. Ls amigos de San Sebastian, bendo que inda staba bibo, lebórun-lo para casa de ua amiga, de nome Eirene – Santa Eirene, que l mantubo scundido i le tratou las brechas até que quedou curado. Ls amigos acunselhórun-lo a salir de Roma, mas el quedou para pregar la doutrina de Cristo i fui mesmo a tener cul amperador para renher cul, por andar acontra ls cristianos. L'amperador, que cuidaba que San Sebastian starie muorto, mandou-lo prender i que fusse berdascado até a la muorte i fui l que fazírun ls suldados romanos, desta beç certeficando-se que starie mesmo muorto i botórun-lo a un lhodaçal. Ls cristianos recuolhírun l cuorpo i anterrórun-lo na bia Apia, en Roma, na catacumba que hoije ten l nome de San Sebastian.
L culto a San Sebastian ye mui antigo i las pessonas recúorren a el para las librar de las grandes malinas cumo la peste i para le guardar ls animales de las malinas.
