Un milhon i 220 mil euros para l çtrito de Bergáncia. Ye l que stá çtinado ne l PIDDAC para 2010. San menos seis melhones i meio d'euros de que ne l'anho passado, ne l que diç respeito a ambestimiento. L'ourçamiento sofriu assi un corte drástico i ye mesmo l balor mais baixo an to l paíç cumparatibamente culs restantes çtritos. Astanho, l Porgrama de Ambestimientos i Çpesas de Zambolbimiento de la Admenistraçon Central apersenta dotaçon para quatro de ls 12 cunceilhos de l çtrito: Bergáncia, Macedo de Cabalheiros, Miranda de l Douro i Mogadouro.
La capital ye quien recibe mais denheiro, acerca de 685 mil euros, sendo que grande parte de las berbas ye çtinada a las nuobas anstalaçones de l Centro de Repuostas Antegradas i a la reabelitaçon de l Anstituto Politécnico de Bergáncia. Miranda de l Douro ye l segundo cunceilho que mais recibe. Son acerca de 266 mil euros, de ls quales 241 son para la remodelaçon i ampliaçon de l Museu Tierras de Miranda. Macedo de Cabalheiros recibe 181 mil ouros para la Cámara Municipal i un lar de bielhos i Mogadouro 88 mil tamien para la câmara i para remodelaçones ne l tribunal.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
