L tiempo bai demudando i la bida bai cuntinando i a cada die nuobas çcubiertas se ban fazendo i nuobas necidades ban aparcendo, ye assi que las sociadades ban eiboluindo, mais por fuorça de l tiempo que pul nuosso querer, mas ye siempre buono lembrar que l mundo nun ye solo l que nós coincemos ou que l modo de bida ye eigual an todo lado. Tamien nun podemos eignorar la realidade i debemos dar balor a muitos oufícios, que son de toda la bida, mas cuntínan a fazer sentido, porque inda cuntínan a ser úteles.
L bideo que bos amostro hoije ye de l oufício, que se puode tamien chamar de arte, de fazer gaitas de foles. Tiu Arribas inda las faç cumo toda la bida se fazírun i inda las toca por esse mundo afuora. Ye la gaita de foles mirandesa, que nada ten a ber cun la de outras regiones. Puode fazer-se outra gaita de foles, cun outros materiales ou cun outros sonidos, mas nun serán eiguales. Para quien quejir daprender mais subre este oufício, que beia l bideo até al fin, até porque las eimages finales son mesmo guapas.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
