Reuniu an Bila Real la CEGTMAD i cumo ye uso nestas reuniones, la pormoçon de ls comeres i de ls binos de la region ye l mais amportante i cumo fui an Bila Real, la chicha de la raça maronesa fui apreciada al almuorço, mas antes l Drº. Virgílio Alves, porsor de la UTAD i presidente de la Associaçon de Criadores de la Raça Maronesa dou ua liçon subre la raça Maronesa i la chicha dessas bacas.
Subre ls binos falou l Profº. Nuno Magalhães, tamien porsor na UTAD, que mos dou ua berdadeira liçon de la stória de la binha. Mas la cultura tamien nun fui squecida i l Drº. Pires Cabral, deleciou a todos cun la leitura i splicaçon de ls bersos subre l “melro”, de Guerra Junqueiro. La arte i musica, cumo nun podie deixar de acuntecer tamien tubírun l sou momiento alto, nun stubissemos na “Casa da Musica de Vila Real”.
Acumpanhórun las atibidades, ls gueiteiros de Sendin i un grupo de sendineses i sendinesas, que fázen parte de la cunfrarie ajudórun tamien a que todo corrisse bien. Mas ye tamien amportante dezir, que nua sposiçon de retratos subre la musica de la region, bimos Henrique Fernandes, un de ls nuossos(Sendin) talentos na musica.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
