Mais un anho i la ACREFA (Associaçon Cultural de Fuonte Aldé) ourganizou l III Cuncurso de Binos . Ye ua de las atibidades mais sugestibas de la aldé i que yá bai sendo cada beç mais coincida por todo l Praino i este anho houbo giente de fuora que bino para partecipar i apreciar ls binos que stubírun a cuncurso.
Ls binos
Ls prémios
Cuncorrírun 16 binos de biticultores de la aldé, que fázen ls binos de las sues binhas i de modo tradicional. L cuncurso decorriu na sede de la Associaçon cun toda la dinidade i cun respeito por reglas bien defenidas. Ls binos fúrun recolhidos pula ourganizaçon, diretamente ne ls pordutores i fúrun apreciados por un júri cumpetente.
L júri de probadores
De l júri fazírun parte l presidente de la Coopratiba de Sendin, un einólogo de la nuossa bezina Spanha, que ten binos recoincidos na region de las arribes de l Duero, un membro de la Cunfrarie de Einologie de Tas ls Montes, un angº. a trabalhar nua Associaçon de l Parque de l Douro Anternacional i ua drª de Fuonte Aldé, filha de biticultores i apoiante destas einiciatibas.
L Cumbibio
L cuncurso ten sido amportante porque ten feito ls biticultores melhoráren ls sous binos de anho para anho i porque faç cun que ls mais moços gánhen amor a las buonas práticas einologicas i l gusto por estas einiciatibas. Fui amportante ber ls mais moços íren a receber ls prémios de partecipaçon, an beç de ls pais i abós. L cumbibio ne l fin amostrou cumo se debe fazer ua tierra grande, sin politiquice.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
