HOIJE FAÇ ANHOS…
Las frases a las bezes ténen bárias anterpretaçones i muitas bezes, l que ye nun parece i l que parece nun ye. Para quien lei l títalo i por bias de las amboras de ls últimos dies, la maiorie de ls leitores de l HOIJE faç la ligaçon deste al die de la lhéngua mirandesa. Mas ua lhéngua nunca faç anhos nun die determenido, bai-los fazendo tols dies.
Porgrama "boas tardes" da SIC
Hoije fui l die que fui anstituido, se ye que fui, para se dedicar esse die tols anhos a la lhéngua mirandesa. La cámara dedica hoije l die a la lhéngua i para esso faç bárias atibidades. Deilhas bos daremos amboras ne ls dies que se síguen.
Amadeu Ferreira na SIC
Mas quien faç anhos ye l nuosso jornal on-line HOIJE, porque fui ne l die 17 de Setembre de 2007, que ampeçou la sue publicaçon diária i que nunca parou, cuntando cun 1096 amboras i fui bejitado mais de 355 700 bezes. Fúrun amboras de l Praino i de las aldés, de la giente, de la lhéngua, de la stória i de la cultura.
estes fúrun ls purmeiros retratos
Tamien fui siempre an mirandés (bariante sendinesa) que las amboras fúrun screbidas, tamien este die de la lhéngua ye l die de l HOIJE , mas l HOIJE solo ye l que ye, porque melhares de pessonas pul mundo l fázen caso.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
