Die 24 la Cooperatiba yá recibe ubas de ls associados, mas yá hai alguns mais apressados que ban antes a bendimar pal pipo ou para bendéren para fuora. La Cooperatiba ten apostado na culidade i solo reciebe ubas apuis de tener feito la recuolha de ubas durante trés sumanas, para ber cumo bai eiboluindo la maturaçon.
Apuis de las análeses al grau i a la acideç ye que se puode saber cumo ban eiboluindo las ubas i solo agora hai la garantie que drento de ua sumana starán buonas para se poder fazer un bun bino. Ye cierto que hai uas binhas que poderán star mais adelantradas i outras menos, mas la Cooperatiba ten que ber l giral.
Tamien las aldés stan scalonadas cunsante l tiempo de maturaçon de las ubas, pul que fui para todas las freguesies l’andicaçon de quando dében bendimar ls associados dessas tierras.
Las últimas amostras fúrun tiradas hoije i al bejitar las binhas, bimos l’adelantrado de las obras de l IC5, por esso bos ponemos ls retratos de las obras na staçon de Sendin i ne ls Campos.
Hai que porparar ls pubelos i ls pipos, ls que quejíren fazer bino an casa yá nun precísan de tener tanto trabalho, porque la Cooperatiba bende mosto als associados para l facelitar l trabalho i ajudar a preserbar l’ambiente, yá que se eibita que la giente bote l bagaço por ende a poluir l termo.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
