Azinhoso fizo l çfile de burras i l’almuorço fui baca mirandesa, mas era miesmo i de la buona, criada cun todo l carino que solo ls berdadeiros criadores sáben dar i nós stubimos alhá, mas mui acerquita, lhougo alhi pals lados de Sampaio, adonde stubo para ser feita ua barraige que iba a ligar ls cunceilhos de Mogadouro i Macedo, na aldé de Gralhós, de loutro lado de l riu Sabor, houbo çfile de bacas mirandesas. Fui ua einiciatiba de la Câmara de Macedo i cun l’apoio de la Associaçon de Criadores de Bobinos da Raça Mirandesa.
Ls bobinos que aparecírun al çfile éran eisemplares bien tratados, l que amostrou bien que hai criadores que sáben tratar i que ténen ourgulho ne ls sous bobinos. La baca mirandesa ye sien dúbeda un de ls mais guapos animales de criaçon i naide queda andefrente quando ls bei. Mirai bien para l bideo i apreciai la raça mais nobre de bobinos de la Ouropa , si porque quando bien tratadas, las bacas parécen que ténen l pelo de beludo i son amponentes ne l sou star. La chicha ye de eieleiçon i nun ye solo la puosta que ye buona, qualquiera parte ye ua marabilha, bonda saber-la porparar. Hai muitos outros pratos que tenemos que dar a coincer.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
