Onte fui die de caça i muitos caçadores gustórun de ir, mas ye bien berdade que l’home ye un de ls animales mais eigoistas de la naturaleza. Gusta de caçar i faç todo para satisfazer ls sous anstintos de caçador, mas nun quier que ls outros animales téngan tamien ls sous dreitos. Quantas bezes, bemos animales que nun se púoden caçar, solo porque púoden cumpetir cun ls caçadores, séren atingidos puls tiros? Fui l que acunteciu a esta águila de asa redonda, fui ne l’Algarbe, mas tamien eiqui las hai i son un de ls patrimónios de l Douro Anternacional.
Mas tamien hai caçadores que sáben respeitar la naturaleza i fázen de la caça un çporto, mas tamien un modo de preserbar ls animales, que d’outro modo staríen cundanados a zaparecer. Nun ye la caça que stá mal, mas l modo cumo se pratica. Mas para alhá de ls caçadores respunsábles, hai tamien muita giente que faç todo puls animales i este bideo amostra bien l que se faç pul paiç. Ye un liçon que eiqui deixamos.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
