Henrique Gaiteiro, un de ls gaiteiros mais coincidos de l Praino i que bem de ua familhia de geraçones de gaiteiros, fui antrebistado pula Giente TV i falou un pouquito de l mirandés, que se bai falando nas geraçones mais nuobas. Esta antrebista fui feita ne l Canadá, durante la bejita que ls pauliteiros de Dues Eigreijas fazírun ne l Berano als nuossos eimigrantes de l Praino que bíben ne ls Stados Ounidos i ne l Canadá.
Para ls que solo sáben l que se passa a la sue puorta i fálan de l que l’amporta para la sue pormoçon ou para ganhar eileiçones, eiqui fica este bideo para amostrar que muito sendinés i muita giente de l Praino, pormóben pul mundo las nuossas tradiçones, la nuossa lhéngua i las nuossas tierras, porque gústan i áman l Praino. Ye esta giente que debe ser apoiada i nó ls que porqui ándan a saber dun ourdenadico para séren criados de l poder.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
