Acabou l resgate de ls mineiros i l redadeiro mineiro saliu sano i salbo, ye berdade que fáltan salir alguns de ls socorristas que fúrun al fondo de la mina ajudá-los a salir, mas estes fazírun la fiesta de ber que cumprírun la sue misson, salbar ls 33 mineiros, que todo cuntine a correr bien para todo acabar cun perfeiçon. Chile i todos ls paízes que ajudórun, stan de parabienes. L bideo queda eiqui cumo marco stórico, tamien ne l HOIJE, cumo un sinal de que l mundo ye melhor i ls balores de la liberdade i de la fraternidade son eicenciales para un feturo mais risonho.
Para ls sendineses debe ser tamien ua liçon, para que daprénden a ber que la ounion faç la çfréncia i puode lebar-mos loinje. Tenemos tamien nós, sendineses, muitos trabalhos amportantes a fazer, agora ye daprender cun estes eisemplos a ultrapassá-los. Oubi bien las palabras de l presidente de Chile i l coro final, son marcos stóricos.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
