La feira de ls Grazes de Mogadouro ye ua de las feiras mais anti(g)as de l Praino i que faç benir giente de tol paiç i de las tierras de Castilha-Lion, Spanha. Este anho tamien houbo giente de outros paízes, cumo Francia, que ten ua cidade harmanada cun la bila de Mogadouro. Este anho stubírun representados pula Associaçon Ploumadouro de la cidade Ploumagoar, que mos traírun ostras, para quien quejisse porbar, cousa rala porqui i que bino sustituir l peixe seco doutros tiempos i muitos outros pordutos tradicionales de la region Cotes d’Armor de la Bretagne.
Na feira habie de todo i la marrana nun faltaba, cumo fui siempre uso zde cientos de anhos. Mas las nuobas tequenologies tamien aparecírun por alhá, percipalmente ne ls artimanhos para la agricultura. Fui anteressante ber cumo la giente apreciaba ls artimanhos para poner ne ls tratores de modo a tornar mais fácele la apanha de la azeituna i ls çtroçadores de mato, que ban a judar a tratar melhor de las tierras de floresta i assi eibitar ls fuogos. Ls gaiteiros animórun la tarde i manhana cuntinará la feira cun las pauliteiras de Valcerto a animáren la tarde.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
