Ls grazes de Mogadouro fúrun ourganizados pula Associaçon Comercial i Andustrial de Mogadouro, cul apoio de la Câmara i para alhá de la feira de rue, tubo tamien la feira de artezanato i Feira Franca de pordutos regionales, nun pabilhon cobierto adonde stubírun muitas Associaçones i pordutores de bárias regiones de Pertual i de Spanha i Francia, que lebórun ls sous pordutos. Para animar la feira stubo un grupo de cuncertinas, onte habiemos dito que staríen las pauliteiras de Valcerto, mas fui ua anformaçon arrada de que pedimos perdon.
Manhana haberá un seminairo subre las abeilhas ourganizado pula Associaçon de Apicultores de l Parque Natural de l Douro Anternacional ne l auditório de la Casa de la cultura de Mogadouro, cuntinando la XVI Feira Franca de Pordutos de la Tierra , probas de miel i cuncurso de rótulos i bejita a la sala de tirar l miel, que bai a ser einougurada na anti(g)a scuola de Zava.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
