Poucas bezes podemos ber l que acuntece als nuossos filhos quando ban para la Ounibersidade (Ounibersidade eiqui debe antender-se cumo l Ansino Suprior). Mandamos-los pul mundo a studar i quedamos a pensar solo ne ls porblemas que eilhes ban a achar i ne ls que nós bamos a tener. Cuido que ye buono que este bideo seia bisto por quien ten filhos que este anho antrórun na Ounibersidade, percipalmente ls que antrórun ne l IPB. Fui assi que fúrun recebidos, mas por todo lado las anstituiçones, fázen ua fiesta para ls que éntran de nuobo.
L IPB ten yá mais de 7 000 alunos, ye quaije tanto cumo la giente de l cunceilho de Miranda. Agora hai que acumpanhar la sue caminada, porque outras fiestas le ténen porparadas, nó para bien deilhes, mas para aporbeitáren la sue einespriéncia. Ye tiempo de perdermos un pouco de l nuosso tiempo para ls acumpanhar i apoiar. abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
