Tamien Bomioso tem yá la sue zona andustrial i l zambulbimento bai-se fazendo cun las pessonas a cráren l sou próprio amprego i a criáren trabalho para que muitos outros téngan adonde trabalhar. Las tierras solo púoden ser grandes quando se dan cundiçones para todos podéren progredir i se ajúdan ls que quíeren criar riqueza.
"O FUTURO JÁ ESTÁ EM CONSTRUÇÃO"
Que melhor frase que esta i que stá junto a la obra de la fábrica de trasformaçon de la carne mirandesa i que ye un ambestimento de mais dun melhon de euros, que la Cooperatiba Agro-Pecuária Mirandesa stá a fazer na zona andustrial de Bomioso. Muito hai que fazer noutras tierras, para que nun le passe cumo al burro de San Brás, que an beç de ir para lantre anda para trás. Mas nien todo puode ser eigual, yá ne l tiempo de Salazar habie ua cantiga que ampeçaba assi:
“Lá vamos, cantando e rindo”…
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
