La LOCALVISÃO oubiu l pobo subre l die de las bruxas i ye dessa reportage l bideo que bos amostramos. Podereis questionar la ambora i l’antresse de l bideo, mas para la giente de l Praino i para quien ben al HOIJE ye mui amportante. Tamien para l mirandés i para ls studiosos de la lhéngua ye amportante para ber l que nun se debe fazer al oubir la giente. Mas para nun starmos a repetir las cousas acunselhamos-bos a ir a ber la ambora de l’anho passado, ne l die 30 de Outubre de 2009.
Quando se faç un trabalho destes, hai que tener l cuidado de oubir giente de bárias eidades i percipalmente las mais bielhas i las menos aculturadas, porque se nó, l percipal nun l quedamos a saber. Hai giente que gusta de dar la sue oupenion sien nada saber ou que quier dezir l que le cúmben i estas cousas ténen que ser rigorosas, percipalmente para quien faç oupenion. La stória ten que ser l que ye i nó l que queremos nós ou la que mos antressa. Esto bal tamien para la lhéngua mirandesa…L die de las bruxas tubo ourige na cultura celta, que faç parte de la nuossa cultura, mesmo antes de eiqui se falar mirandés, lhéngua que ten tamien muitas palabras anteriores a la chegada de ls romanos i de l latin, la sue lhéngua.
