Fui cun alegrie que bimos ls nuossos bezinos de Fermoseilhe a fazer compras na feira d’anho, assi cumo muitos spanholes de las tierras de Zamora i Salamanca. Tamien ls tamborileiros de Fermoseilhe stubírun a animar ls Grazes.
Para ls que nun sáben, Fermoseilhe ye ua poboaçon de l’outro lado de l riu Douro, que faç raia antre Fermoseilhe i Sendin, mas antre las dues tierras nun houbo raia porque siempre las gientes de ls dous lados de l riu se antendírun bien.
L bideo amostra un sfregante de la atuaçon de ls tamborileiros na feira, delantre de l restourante de ls mardomos de la fiesta de Santa Barbela. Ansinórun a dançar i ua mardoma nun se fizo rogada i amostrou que para quien ten jeito nun ye defícele daprender.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
