ONTE FUI ASSI…
FUTEBOL
SENDIN – 1
REBORDELO – 3
L futebol ye un çporto an que l resultado ye amprebisible i acuntécen cousas que son defíceles de splicar. L campeonato çtrital de la A.F .Bragança tubo onte la sue quarta jornada i l Sendin perdiu 1-3 cul Rebordelo. Dous jogos fuora sien perder i dous jogos an casa a perder ye la sina de l Sendin. Ye berdade que l resultado poderie tener sido outro, mas l Sendin nun puode jogar bien nun campo que yá parece mal ne l çtrito.
Neste campo ganha quien ten mais suorte ou mais fuorça, porque jogar la bola nun ye preciso i l Sendin arranjou ua eiquipa que ten jogadores para jogar bien i nó para jogar an fuorça. L jogo tubo muita paraige i las faltas fúrun muitas l que fizo cun que acabasse cun un pequeinho barulho antre alguns jogadores, mas que l’arbitro lougo resolbiu cun la spulson de un jogador de l Rebordelo.
L Rebordelo tubo mais suorte i mais fuoça i ganhou. Nada a dezir de l’arbitro i ls jogadores tamien cumprírun, tanto de un lado cumo de l’outro i las pequenhas anterquidéncias antre ls jogadores fúrun mais por cousa de l stado de l campo, que por maldade. Parabienes a quien ganhou, mas l Sendin nun puode quedar triste, porque amostrou que ten eiquipa para fazer muito mais.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
