L die stubo de chuba, mas a meia tarde parece que adebinou que algo de nuobo staba para acuntecer. Çpuntaba ua nuoba poetisa de lhéngua mirandesa, Conceição Lopes , que cul pseudónimo de SãoSendin , apresentaba l sou purmeiro libro – Tiempo de Cereijas – i que cun mais quatro mirandesas, que publicórun tamien ls sous purmeiros libros, einicían ua nuoba era na literatura mirandesa.
La casa de l Pauliteiro, fui pequeinha para recebir la giente que quijo star na apresentaçon de l libro, que Amadeu Ferreira fizo cumo só el sabe. L libro faç parte de la coleçon An Mirandês , de la eiditora Zéfiro.
Inda nun tubimos la ouportunidade de l ler, mas pul que coincemos de la outora, poderemos dezir, que ls poemas que fázen parte del, tenerán culidade i cumo las cereijas, deixarán ls leitores apelidáren por mais.
Qien stubo presente tubo dreito a dedicatória
Ne l fin houbo fruitos secos i licor para quien quijo. Ls amigos de la léngua stubírun presentes, até Ana Maria bino de França.
A Conceição Lopes l HOIJE deixa eiqui ls parabienes i speramos que outros poemas cuntínen a anriquecer la senara de la léngua mirandesa.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
