Zé a anformar l HOIJE
Hoije houbo un grabe acidente nas obras de l túnel de la barraige de Bemposta i un trabalhador tubo que ser eibacuado de heilicópetero. Ls bumbeiros de Sendin fúrun a buscá-lo na ambulância i quando chegórun al campo de la bola de Sendin, sitio scuolhido para parar l heilicópetero de l INEM, yá este staba a la spera.
Puode parecer que yá se ban repetindo ls acidentes, bezes de mais, mas la percentage nun ye maior que na outras grandes obras, inda que fusse melhor nun haber nanhun acidente, mas hai que ber que ne l Praino, las obras de las barraiges i de las stradas, oucúpan melhares de trabalhadores, por esso tenemos amboras de mais acidentes.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
