FUTSAL
Hoije l Benfica ben a Mogadouro jogar para l campeonato de la purmeira debison de FUTSAL. L jogo ye ne l pabilhon de la Junta de Freguesie de Mogadouro i realiza-se a las 18h. Ye un jogo atrasado, mas que ten la maior amportáncia para l Benfica, porque ten que ganhar para mantener anteiras las possiblidades de ser campeon de l’Ambierno.
STUDANTES DE SENDIN TAMIEN SÁBEN LUTAR PULS SOUS DREITOS
foto rádio Bergáncia
Ls alunos de Sendin i de las aldés alredror, que ban a scuola, ne l autocarro para Miranda, recusórun-se a ir, porque ls autocarros nun tén las melhores cundiçones. “L'ampresa mandou pa l local ua biatura i trasportou ls alunos para la scuola i yá chegórun un cacho atrasados” cunta António Santos, salientando que “esto ye ua situaçon que yá se ben arrastrando hai algun tiempo”. “Ye ua carreira que yá atingiu l lemite de bida útele, quanto a nós, yá fazimos chegar esso a l'outarquie cun quien tenemos stado a trabalhar ne l sentido de sustituir estas carreiras mais bielhas”.
IC5
Stá quaije pronto l cacho de l IC5 antre l alto de l Pópulo i l nuolo de Carlão i spera-se que abra drento de dies, este cacho bai a acurtiar l tiempo de biaige para l Sul de l cunceilho de Miranda i Mogadouro, para quien yá bai por Meirinhos para Bila Real i l Porto.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
